رسالة من تحت الماء

واحد صاحبى خد فى وشه و طلع انجلترا، مراته جاتلها بعثة دكتوراة راح طالع معاها المهم صاحبى ده كان ولد محترم أوى و ابن ناس و بصراحة سفره كان خسارة لمصر وليا أنا شخصيا ، المهم بعتله على الايميل مقال من مقالاتى)اللى همه اتنين أصلا) عشان اخد رأيه فيها و رد عليها وعجبته ( بس مش هوه ده الموضوع) ،

كتب لى فى الأخر بأنجليزيته المتقنة ( واد ابن ناس و مدارس لغات مش تعليم مجاني لا مؤاخذة يا رجالة )
( is there any hope? I hope!! )
الترجمة : هل هناك أمل؟ اتمنى ذلك
ماعرفش ليه وانا بترجم افتكرت المسلسلات المكسيكي المدبلجة (لقد رأيته اليوم في مزرعة دييجو والجو ده) المهم ماطولش عليكو و كتبت الرد التالى:

عزيزى محمد،

أرجوك لا تصدق الأقلام المغرضة التى تريد أن تظهر الجوانب السيئة في مجتمعنا. بالعكس احنا عندنا الظروف اتغيرت تماما لكن في حركة تعتيم متعمدة مقصود بيها الإساءة إلى سمعة مصر.

وزى مانت عارف يا محمد إن مصر هي أمي وأنا ماقبلش إن حد يسيء إلى سمعة أمي أبدا...

المهم طرأ على البلد تغييرات ايجابية كثير جدا منها على سبيل المثال لا الحصر إعلان السيد الرئيس عن انتخابات رئاسية مبكرة لسنة 2010 و عن تشكيل حكومة انتقالية تخيل مين وزير الأعلام فيها؟ إبراهيم عيسى، لأ عارف كمان مين وزير الشباب؟ عمرو خالد أما عن وزبر البحث العلمى فهو أحمد زويل وتعيين وزير العدل يحيى الجمل و حمدين صباحى وزيرا للخارجية ده غير ناس تانية محترمة كتير للحقائب الوزارية الأخرى.

بخصوص التعليم فكثافة الفصول وصلت إلى 10 في كل فصل والتعليم العالي اتطور بشدة بعد أن وصل الحد الأدنى لمرتبات دكاترة الجامعة إلى 10,000 جنيه وبدأت جامعات كالجامعة الأمريكية تعانى من قلة الإقبال عليها بشكل ملحوظ وده طبعا بعد ما دخلت كل الجامعات الحكومية عندنا في قائمة أفضل 500 جامعة على مستوى العالم،

النهاردة العيش البتى بان من أجود أنواع القمح المصري بيوصل كل يوم لحد بيتك من خلال مشروع االديليفرى للشباب المصري والأفران المتطورة برضه ملك شباب مصري ،

عندنا النهاردة في البلد أكتر من 200 حزب سياسي كلهم شباب، و كمان فيه مشروع القرض الحسن وده بيدى كل شاب قرض للزواج أو للعمل (يبدأ بيه مشروع يعنى)،

فاكر خالد الفئرى صاحبنا؟ دلوقتى عنده مشروع كبير جدا ومشغل عنده أكتر من 300 شاب،

المشكلة الرئيسية عندنا دلوقتى هي زيادة العمالة الإماراتية والخليجية بشكل عام لأن الخلايجة عملوا استثمارات أجنبية مباشرة في مصر والمصريين بقت مرتباتهم عالية عليهم فقرروا استخدام عمالة خليجية و إماراتية لأن حتى الهنود برضه مرضوش ييجوا بعد التحالف اللى مصر عملته مع الهند في صناعة البرمجيات،

أما السيد جمال مبارك فقد قرر إلغاء أمانة السياسات واتفرغ لجمعية جيل المستقبل لخدمة الشباب وأعلنها صراحة انه مش هيلعب سياسة تانى،

لازم تيجى يا محمد عشان تشوف اللى أنا بقولهولك ده بنفسك

والسلام ختام

المخلص

أحمد

انتهيت من مقالتي هذه وقريت إعلان طالبين رئيس تحرير لجريدة قومية رحت باعت السى فى علطول