فجر جديد

مستنى ايه؟؟!
مستنى فجر جديد؟؟!
فجر جديد فين و امتى؟؟!
على البلد كان سعيد؟؟!
كان سعيد..امتى..؟!
يكونش قصدك أيام هارون الرشيد...
و لا أيام الخليفة اللى جاى أبو يد حديد...
يووه..ده أنت أملك بعيد...
ماهو أصل الحكاية......
حكاية ايه....
بس اسمعنى يا عمر....
اسمع مين....
عاوز أقولك انه...
يوووه هتقعد تعيد و تزيد....
تكونش فاكر نفسك مصطفى كامل
ولا محمد فريد....
ماهو الموضوع....
موضوع ايه....
ده أنت عندك خمس عيال...
و الكبير جاب لى حفيد...
و الوسطانية عايزة تشترى فستان جديد...
وداخل جمعية مع أبو أشرف و صدقى و عبد الحميد..
ادعى لى... أطلع الأول لحسن أنا ع الحديد....
تعرف... ياريتنى أرجع بلدنا فى الصعيد...
أهوه الدار هناك يساع الكل و يفيض....
كنا نقضى الليل فى كلام و حديث....
كنا بنفطر سوا الصبح فطير و بيض و سميط...
و فى المدرسة نترص طابور لجل ما نقول الأناشيد...
كنا بنلعب فى الوسعاية جنب النخل أبو جريد ....
و أما الحاجة...تزعق و تقول..يا ولد العب بعيد....
كنا نصلى...نصوم...ونزكى...
الله يبارك...الله يزيد....
يوم أكتوبر...أمى تزغرد
خير يا اما...
قالت... أخوك شهيد...

نمشيها خناقة على مصروف البيت

حد فيكو فاكر الجملة دى، اتقالت كتير؟!
الجملة دى اتقالت فى رائعة تامر حبيب (السيناريست طبعا) سهر الليالى،
أحمد حلمى قالها لخالد أبو النجا و كأنه بيقوله خلاص لو أنت مش عايز تواجه مشكلتك الحقيقية أنت حر،
هو احنا له ماعندناش القدرة على مواجهة مشاكلنا، مش بس كده ده احنا كمان بنديها نيك نيم،
فالرشوة تبقى كرامية و النصب يبقى شطار و فهلوة، ده على المستوى العام.
و حتى على المستوى الخاص كل واحد فينا أكيد عنده مشكلة ما و عامل نفسه مش واخد باله منها و يفضل سايبها لغاية مافجأة تضرب فى وشه زى عفريت العلبة،
يا جماعة لازم نواجه مشاكلنا لأن دى بداية حلها، هى صعبة طبعا، و الأصعب منها أنك تقدر تواجه نفسك بجد، أقولوكو حاجة؟
عايزين تعرفوا انتو ماشيين صح ولا لأ من غير ماتتصلوأ بخط الفتوى 0900 و لا برنامج المسلمون يسفسطون، يوم ماتقوم من النوم الصبح و تبص فى المراية و تحس أنك محترم نفسك أودام نفسك أعرف أنك ماشى صح،
سهل أوى أنك تخدع الناس و تبينلهم اللى انت عايز تبينه لكن أوعى تخدع نفسك
"هنا تكمن المصيبة يا سيدى اللورد" معلش حتة لغة كدة.... المهم نرجع مرجوعنا لازم كل واحد فينا يواجه نفسه و لازم يكون عندنا الشجاعة الكافية لده عشان نتنقل نقلة جديدة فى حياتنا و ده على المستوى الخاص يعنى على مستوايا أنا و أنت، أهم من المستوى العام والحكومة و الريس و الكلام ده،
كده؟ و لا نمشيها خناقة على مصروف البيت

اييه؟؟

رديت عليه..

هو كده مش عاجبك ليه...

ده حتى الدنيا حلوة يا بيه...

و السما بتمطر بانسيه...

حتى فريقنا فاز امبارح...

قول ورايا... هييه...

شفت الناس ازاى مبسوطة...

و هى قاعدة فى الكافيه...

شيشة و طاولة...

و دومينو يا ريس...

حتى الشاى بقى اسمه...

أوليه...

و الاتنين الجاى أجازة...

والحد هاخده كونجيه...

أوعى تصدق حد يقولك...

كانى و مانى...

ده أكيد ابن ايه...اسمع أخوك شعبولا

و قول اييه...

قوللى بذمة أمك...
أكتر من كده اييه...

وحدووه

دخلت الشادر، الناس زحمة أوى و لابسين حاجات مختلفة اللى لابس بدلة و اللى لابس جلابية و اللى لابس فى الحيطة و شيوخ و قساوسة و دعاة من اللى بيطلعوا فى الفضائيات و شخصيات عامة كتير أوى حد قريت له مقالة قبل كدة، حد شوفته فى توك شو، و ناس عادية، وشحاتين، لفت نظرى المنظر أوى، أول مرة فى حياتى أحضر عزا بالشكل ده،
المهم إن الناس اللى كانت قاعدة ماكنتش بتبص لبعض خالص، كل واحد فيهم فى عنيه نظرة اتهام للتانى و كأنه السبب، قلت فى قل بالى، أما قلة ايمان صحيح، الموت ده قضاء و قدر، الأخطر من كدة إن مافيش حد واقف ياخد العزا، فيه واحد مولع سيجارة هنا، واحد بيشرب فنجان قهوة هناك،
فى وسط الكلام ده كله لقيت مخرج من بتوع الفيديو الكليب المشهورين واقف مع رجل أعمال مشهور بردو بيتفقوا على مشروع قناة بورنو جديدة بس باشتراك، مشفرة يعنى و معاها Parental Control عشان مايصحش الأولاد يشوفو الحاجات دى طبعا،
المهم لقيت واحد بيبص لى باهتمام أوى و قالى تعالى يا ابنى قلت له: خير قال لى: انت مش عارفنى قلت له بصراحة: حضرتك شبه الريس جمال عبد الناصر الله يرحمه قال لى: أنا عبد الناصر قلت له: معقولة يا ريس هو حضرتك تقرب للمرحوم، قال لى قصدك للمرحومة، قلت فى عقل بالى: أنا شكلى جيت عزا غلط بس مش معقوله أبينله قلت له: هو حضرتك تقرب للمرحومة ايه قالى: أنا ابنها قلت له: و حضرتك ابنها الوحيد قال لى: بالعكس كل اللى انت شايفهم فى العزا دول ولادها قلت له: أمال شايفهم مش مهتمين قال لى: ماهى ماتت من الحسرة،
فجأة سمعت صوت غريب وى ناس عمالة تهتف باسم مصر و لقيت نفس الناس اللى فى العزا دو خارجين يجروا و رافعين علم مصر و بيهتفوا مصر مصر تعيشى يا مصر قلت لهم خير يا جماعة؟ قالوا مصر خدت بطولة أفريقيا النهاردة..........

توم اند بصل

النهاردة أو زى النهاردة من 28 سنة اتولدت (وانتوا طيبين الله يخليكوا)

عندى واحد صاحبى امريكانى اسمة توم مولود فى نفس التاريخ 21/1/1981

متخرج من كلية ادارة الاعمال (جامعة هارفارد)

وانا برضه متخرج من كلية التجارة (جامعة طنطا)

مش فارقه كتير يعنى........

توم عمل M.B.A

وانا كمان عملت M.B.A

توم راكب عربية JEEP 4x4

وانا راكب عربية مش 4x4

عادى برضه مش فارقه.........

توم بيلبس Timberland وانا كمان بلبس Timberland

توم متجوز وعنده بنت اسمها مونيكا (غير بتاعة كلينتون طبعا)

وانا متجوز وعندى حسين (ممكن يتجوزوا لما يكبروا...مفيش مشكلة.....أهو تكامل حضارات برضه )

توم عندة الBusiness الخاص بتاعة وبيكسب حوالى 300000دولار سنويا

وانا كمان عندى ال Business بتاعى وباكسب، صحيح مش 300000دولار لكن باكسب الحمد الله

توم بيسافر أجازات في هاواي....

وأنا باطلع الساحل ومارينا .....مش فارقه أوى يعنى

وزى ما عرفتكم أنى مواليد 1981 يعنى من يوم ما وعيت على الدنيا وكلمة رئيس بالنسة لى يعنى مبارك

اما بالنسبة لصديقي توم فكلمة رئيس أو President يعنى (ريجان أو بوش الأب أو كلينتون أو بوش الابن أو أوباما وتحديدا لأن توم انتخب أوباما فهو كان امبارح مع ال2مليون اللى بيحتفلوابانتخاب أوباما رئيس للجمهورية

المرة دى فرقت كتير يا توم وتكسب انت

وكل سنة وانا طيب ........قصدى وانا مبارك............................

متر الوطن بكام؟؟!

متر الوطن بكام؟؟!
وطن ايه!!
وطن يساع كل الاحلام..
وطن ياخد بايدينا لقدام....
وطن يحكمه فارس راكب على حصان..
وطن فيه النجوم..نجوم علم....
مش نجوم افلام.....
وطن لابنى وابنك....
مش اى كلام...
وطن محمد ومينا وعبد السلام...
وطن تمليك مش ايجار...
لا هو صحيح ....
متر الوطن بكام؟؟!....

حدوتة

كان يا مكان فى سالف العصر والاوان يحكى ان دولة اسمها فرعونستان نتجت من تحالف ثلاثة اقاليم (الاقليم الشمالى_استبدادستان)_(والاقليم الاوسط _بوليستان)_(والاقليم الجنوبى_ظلمستان) المهم ندخل فى الموضوع .
قصة شهيرة فضلت تحكيها الاجيال لللاجيال ان حاكم البلاد دى قرر انه يخلى رئيس الوزراء يعمل قرارات تخلى الناس تتضايق ويروح جاى الحاكم يلغيها فالناس تحبه ، المهم جاب رئيس الوزراء وبلغه بالكلام ده وطبعا رئيس الوزراء قاله تمام يا افندم تؤمرنى يا ريس تانى يوم الصبح : قرار من رئيس الوزراء بان اى حد يطلع على كوبرى اكتوبر ( تشابه كباري مش اكتر وبعدين اكتوبر ده شهر في الدنيا كلها )يدفع خمس جنيهات ، الناس عادى جدا بقت تطلع الكوبري وتدفع الخمس جنيهات فى غاية الانسجام ، الريس قالة جرى ايه يابنى ما حدش اتكلم ولا قال حاجة ، المهم رئيس الوزراء راح مطلع قرار انه أي حد ينزل من أي نزلة من الكوبرى يدفع عشرة جنيهات الناس عااااادى برده دفعت ولا حد فتح ده عن ده ، الريس قاله انت مش شايف شغلك ولا ايه أنا مش شايف حد معترض ولا حاجة ، رئيس الوزراء طلع قرار انه غير الخمس جنيهات اللى هتدفعها وانت طالع واللى العشرة جنيهات اللى هتدفعها وانت نازل كل واحد حياخد على قفاة ، وبردة مفيش اى رد فعل ياخوانا
الريس قالك مابدهاش ونزل بنفسه يشوف ايه حكاية العالم دى لقى الناس عادى تدفع وهى طالعة وتدفع وهى نازلة وتاخد على قفاها زى الفل محدش يقول تلت الثلاثة كام، لغاية ما اثناء تفقد السيد الرئيس للشعب لقى واحد سواق ميكروباص متضايق ويصرخ حرام عليكو ، خلصونا بأه ،راح الريس متوجة اليه مباشرة مالك يابنى قولى ايه مشكلتك وأنا أحلها لك ، قال له يا ريس قلتوا ندفع خمس جنيهات واحنا طالعين ok وعشر جنيهات واحنا نازلين زى الفل شغال بس باه يا ريس حكاية القفاة دى الريس قال له : ايوة مالها ؟
السواق : مالهاش يا ريس ولا حاجة بس انتو مخليين واحد من اليمين بس هو ال بيدى القفا يا ريت تخلوه واحد يمين وواحد شمال علشان السكة تمشى بدل العطلة اللى احنا فيها دى ......................................
عايز تقول اية : عايز اقول ان الفساد والظلم والاستبداد لايمكن يتوغلوا وينتشروا بالشكل ده إلا في وجود بيئة صالحة ومهيأة من السلبية واللامبالاة والخضوع انت فكرك فرعون قال انا ربكم الاعلى دى فجأة لأ طبعا هو الأول كان حواليه شوية ناس عمالين يقولوله يا جميل يا عسولة يا شخصية متتكرررش بسهولة لغاية ما الراجل صدق نفسه قاللهم اعملوا لي تمثال راحواعاملين واحد اده عشر مرات وحطوه في أكبر ميدان في البلد وبعدين سموا كل المشاريع اللى فى البلد على اسمه وحطوا صورته في كل حتة وخلوا كل الانجازات بناء على تعليماته وتوجيهاته وبعدين عملوا له قناع من الدهب وبعدين بنوا له هرم وبعدين لما مرة واحد قاله ربنا والكلام ده راح قاللهم : ما علمت لكم من اله غيري ، في الاخر قال بالفم المليان : انا ربكم الاعلى لدرجة ان فرعون لما كان يستشير هامان فى حاجة صعبة ويحلها هامان كان يقول لهامان: ياه هامان انت مخك ده ذرى عشان كدة انا تعبت أوى لما خلقتك.... (تخيل!!)، يعنى بالبلدى كدة لما قالوا يا فرعون ايه اللى فرعنك قال لهم ملقيتش حد يلمنى ....
ياناس ياناس يا مكبوتة ....هى دى الحدوتة ....... حدوتة ................كمل انت بأه